उद्या श्री दुर्गामाता नवरात्र महोत्सव मंडळ आयोजित रक्तदान शिबिरास जास्तीत जास्त लोकांनी प्रतिसाद द्यावा – ओंकार आर्वे

पिलीव/सुजित सातपुते

नवरात्रोत्सव हा शक्ती, भक्ती, श्रद्धा आणि सामाजिक एकतेचा संदेश देणारा महत्त्वपूर्ण उत्सव आहे. आदिशक्ती श्री दुर्गामातेच्या उपासनेतून समाजात चांगले विचार, सेवाभाव आणि मानवतेची भावना रुजवली जाते.याच भक्तिमय परंपरेला सामाजिक कार्याची जोड देत श्री दुर्गामाता नवरात्र महोत्सव मंडळ, पिलीव यांच्या वतीने गुरुवार, दि. १५ ऑक्टोबर २०२६ रोजी भव्य रक्तदान शिबिराचे आयोजन करण्यात आले आहे.

नवरात्रोत्सव म्हणजे केवळ देवीची पूजा-अर्चा आणि धार्मिक कार्यक्रम नव्हे, तर समाजाप्रती असलेली आपली जबाबदारी ओळखून मानवसेवेचा वसा घेण्याची प्रेरणाही होय. दुर्गामाता ही शक्ती, करुणा आणि ममतेचे प्रतीक मानली जाते. तिच्या आशीर्वादाने प्रेरित होऊन गरजू रुग्णांना जीवनदान देण्याच्या उदात्त हेतूने मंडळाने रक्तदान शिबिराचा उपक्रम हाती घेतला आहे.रक्तदान हेच सर्वश्रेष्ठ दान या संदेशातून नागरिकांमध्ये रक्तदानाविषयी जनजागृती करणे, रक्ताची गरज असलेल्या रुग्णांना मदत करणे आणि समाजात सेवाभावाची भावना वाढवणे हा या उपक्रमाचा मुख्य उद्देश आहे. अपघातग्रस्त, शस्त्रक्रियेसाठी दाखल असलेले तसेच विविध आजारांमुळे रक्ताची आवश्यकता असलेल्या रुग्णांसाठी रक्तदान अत्यंत महत्त्वाचे ठरते. निरोगी व्यक्तीने केलेले रक्तदान गरजू रुग्णासाठी जीवनाची नवी आशा ठरू शकते.

हे रक्तदान शिबिर गुरुवार, दि. १५ ऑक्टोबर २०२६ रोजी सकाळी १० ते दुपारी ३ वाजेपर्यंत आयोजित करण्यात आले आहे. शिबिरात सहभागी होऊन जास्तीत जास्त नागरिकांनी रक्तदान करावे आणि मानवसेवेच्या या पवित्र कार्यात आपले योगदान द्यावे, असे आवाहन मंडळाच्या वतीने करण्यात येत आहे. रक्तदान करणाऱ्या रक्तदात्यांना प्रोत्साहन म्हणून आकर्षक भेटवस्तू देण्यात येणार आहेत.

नवरात्रोत्सवाच्या मंगलमय वातावरणात भक्तीला समाजसेवेची जोड देणारा हा उपक्रम पिलीव परिसरात सामाजिक बांधिलकीचा संदेश देणारा ठरणार आहे. देवीच्या चरणी सेवा अर्पण करण्याबरोबरच एखाद्या गरजू व्यक्तीच्या जीवनात आशेचा दीप प्रज्वलित करण्याची संधी या रक्तदान शिबिरातून उपलब्ध होणार आहे.तर चला मंग नवरात्रोत्सव साजरा करूया भक्ती आणि सेवाभावाने ! रक्तदान करूया, एखाद्याचे अमूल्य जीवन वाचवूया !